高雄市政府客家事務委員會

【穿鑿屋】
係台灣早期住家个典型，散見在鄉下農家地區。客家人个「穿鑿屋」，係用幾支單薄个竹析做樑柱，再用篾片編做壁个支架。為了達到防風避雨个目的，就在竹壁上膏上一種特殊个泥。這種泥係用一種蓋古老个方式做成个，通常先到山野个所在挖黃泥，裡肚係有含瓷者為最好，（含瓷个黃泥外表蓋亮麗，黏性蓋強，密度蓋高)，加水之後攞燥禾稈，再用牛抑係人个腳來回踏，分泥同禾稈勻合，然後膏在竹壁上，蓋像這下个紅毛泥。故所，坐在「穿鑿屋」个窗脣抑係壁脣，逐擺清風慢慢仔吹來，總係會鼻著泥香味抑係禾稈个香。

「穿鑿屋」雖然簡單，毋過冬暖夏涼，歇起來蓋舒爽。尤其係在茅屋時代，屋頂上蓋有賁賁个茅草，增加清涼。落雨時節，雨水落在茅草上，淅瀝響，蓋有節奏，會分人睡落覺。熱天恁烈个日頭，乜分茅草擋在外背，屋肚淨有淡淡个茅草清香。寒天北風呼呼袞个時節，有咿呀咿呀个聲，屋仔些把停動，對有驚無險，屋家人團圓共下，圍等火爐，打鬥鼓，正經係天倫之樂。
資料來源：鍾榮富，《高雄客家行腳》（高雄：高雄市政府客家事務委員會，2006年11月）。

【單橫屋】
客家匠師則稱為「伸一邊手祖堂屋」，形成L字形，以三開間个正身為基礎，由單片發展出橫屋，正身个格局就同祖堂屋相同。
資料來源：曾彩金總編纂，《六堆客家社會文化發展與變遷之研究建築篇》（屏東：六堆文教基金會，2001年）

【雙堂屋】
就係成口字形个四合院形式建築，前後堂以同兩片个橫屋基本上都係三開間，橫个直个都有空間圍等天井，通常前堂係作生理抑係招待人客个閒廳使用，後堂就做敬阿公婆个祖堂。
資料來源：曾彩金總編纂，《六堆客家社會文化發展與變遷之研究建築篇》（屏東：六堆文教基金會，2001年）。

【圍龍屋】
圍龍屋係將三開間的正身獨立，同橫屋分開，橫屋圍做ㄇ字形，包等正身，係一種最尊重係建築形式，一般為祠堂係建築形式，屋頂以正身最高，後堂第二，後堂大部份都做閒廳使用。
資料來源：曾彩金總編纂，《六堆客家社會文化發展與變遷之研究建築篇》（屏東：六堆文教基金會，2001年）。

【三合院】
三合院係傳統形式个屋仔，又安到「伙房」，由三排屋仔排做「ㄇ」字形，三面屋棟圍等，頭前有圍牆、大門，裡肚有庭院，乜有起做兩個庭院抑係有起門樓个家庭。
三合院中央个一排係廳房，正中央个一間係正廳，供奉神佛祖先同招待人客，正廳左右兩片个廳房，係大家長同長輩个間房。廳房个左右兩片係橫屋(廂房)，係晚輩个間房按照左尊右卑、內尊外卑分配間房歇，子孫增多以後，橫屋做得向後併列起，毋過新起个橫屋，做毋得比舊橫屋高，表示「長幼有序」个倫常。