客家童謠
「童謠」在每個族群中都有，伊係細人仔時代个最愛，也係大人儕在成長裡肚个重要記憶，「童謠」毋會跈等時間个流逝來退化，淨會歷久不衰。「客家童謠」个詞句並無固定性，做得隨時隨地來改變抑係增減，這正經係客家童謠趣味个所在。在台灣个客家童謠裡肚，大致做得分做兩種，一種係唸个，就係傳統个客家童謠，一種係唱个，也就係創作童謠。
客家童謠主要特色為：
- 客家童謠个變型蓋多。因為客家童謠同其他童謠相同，係用口傳个，每傳到一個縣抑係一個省，伊个內容會改變，故所以蓋多个童謠都係兩首抑係三首鬥做鬥一首个，主題相同，毋過內容些把無共樣。
- 客家童謠裡有一種童謠安到搞尞童謠，係蓋多人共下搞尞个童謠，這係客家人訓練小孩子，對細養成團隊个精神。
資料參考：馮輝岳。客家謠諺賞析
童謠欣賞：
- 月光光之1
月光光，照四方，四方暗，照田崁，田崁烏，照鵡鵡，鴣鴣鳥，叫一聲，老鼠鬼，挖油盎，挖啊出，堵到先生還過得，遇到伯公打屎窟。
- 月光光之2
月光光，秀才娘，船來等，轎來扛，一扛扛到河中央，蝦公毛蟹拜龍王，龍王腳下一蕊花，拿分阿妹轉妹家，轉到妹家笑哈哈。
- 伯公伯婆
伯公伯婆 無㓾雞無㓾鵝，㓾隻鴨仔像蝠婆，豬肉料像楊桃，愛食你就食，毋食𠊎也無奈何，請你食酒綁田螺，酒續無擐著，轉去擐 做得嗎？
註：「蝠婆」即蝙蝠，「㓾」即殺
- 火金姑
火金姑，來食茶，釅茶燒燒，來食弓蕉，弓蕉冷冷，來食牛眼，牛眼滑滑來食那芭，那芭還吂結子，食了會屙硬屎。
- 數字歌
一一一，松樹尾上一管筆，兩兩兩，兩子親家打巴掌，三三三，脫去棉襖換單衫，四四四，兩子親家打鬥趣，五五五，五月十五好嫁女，六六六，河背村莊火燒屋，七七七，天公落水深過膝，八八八，窮苦人家兜粥缽，九九九，兩子親家啉老酒，十十十，粢粑打來軟習習。
- 排排坐
排排坐，唱山哥，爺打鼓，子打鑼，心臼灶背炒田螺，田螺殼，刺到家官腳，家官呀呀叫，心臼哈哈笑
- 嘴嘟嘟
嘴嘟嘟，賣豆腐，嘴扁扁，賣牛眼，嘴圓圓，賣粄圓，嘴長長，賣豬腸。