客家原香~夜合花
高雄市个客家族群大部分來自高雄縣、屏東縣个六堆客家庄，少部份來自中、北部其他客家庄。生活在都會區个客家人，毋像一般傳統客家聚落共下，續係散居在這城市各所在。雖然係隱性，力量斯係無限，各行各業个頭人都做得看著客家人个身影，為高雄市个現代化寫下輝煌个一頁。這成功个後背，有一雙溫柔个手同慈祥个面在默默支持，就係婦人家。
對古到今，婦人家在婚姻及家庭生活裡肚，係一個重要个角色，伊係妹仔、係阿姊、係姐仔、係阿姆。農業社會个勞動婦人家，除照顧一家老嫩大細三餐溫飽外，還愛耕田，𢯭手農務，「女人能頂半邊天」，充分展現婦人家強韌个特質。
隨著時代个轉變，婦人家開始接受教育，接受新个思維，婦人家毋係纏腳嫲，毋係附屬在家庭；來進一步追求自我成長，工作上同男仔人齊頭並進，打爛吔自古「男主外，女主內」个分工，來行向男女共同承擔家庭經濟。係講按呢，婦人家相同走毋出傳統社會對男女角色个期待，造成婦人家工作同家庭「蠟燭多頭燒」个情況。
夜合花，日時頭用綠皮裹等層層个夜合花瓣，就像勞動女性為閃烈日，裹等層層頭巾，煞猛做事；「夜合花」，花香清淡，暗晡頭開放，就像下班後放下重擔，解下頭巾个婦人家，散發出幽雅个女人香，展現溫柔臉龐，同屋家人做伴。夜合花，毋單淨係客家婦女勤儉打拼、質樸个象徵，也代表著現代婦人家韌性、堅強个生活態度！
文章出處夜合花~客家原香