一、客家文學
南台灣有名个客籍文學作家鍾理和、鍾鐵民與曾貴海三位最有名。
鍾理和先生在屏東縣高樹鄉出世，後來徙到高雄市美濃區歇，一生人硬骨在文學創作，厥作品充分表露耕田人心聲同展現鄉野情趣个賁賁情感，反映吔個人生活經歷同悲天憫人个胸懷，就有「台灣現代文學之父」稱號。鍾理和個人手稿、日記、雜記同研究鍾理和文學个相關文件資料今下收藏在美濃尖山个「鍾理和紀念館」。電影界亦識在1980年拍攝傳記電影「原鄉人」，用來表達對這位台灣文壇大師个敬意同追思。寫有《夾竹桃》、《笠山農場》、《菸樓》、《貧賤夫妻》等作品。
鍾鐵民先生係鍾理和个大倈仔，作品長期記錄美濃農村个變化，題材多採用來自農民同農村生活，為台灣農村留下珍貴个紀錄，也有「農民作家」个美名，並得著臺灣文學獎、吳濁流文學獎同客家貢獻獎等殊榮。鍾鐵民毋單只打造「鍾理和紀念館」，更投身社區人文關懷，推動鄉村教育，催生高雄第一所社區大學─旗美社區大學，另興辦「笠山文學營」，萬望文學教育對後生人身上生根。寫有《菸田》、《鄉居手記》、《山城棲地─美濃鄉野紀事》等作品。鍾鐵民過身後，親友同厥作品編撰出版《鍾鐵民全集》。
曾貴海醫師有客家、河洛及平埔三種血統，加上細時節成長在屏東佳冬客家庄，養成伊對客家个情懷、對土地个尊重同中意。曾醫師長期關懷台灣，詩充滿本土文化同人文情懷，最有名个客家詩〈夜合〉，以夜合花來比做客家婦女个含蓄同堅柔，質樸同勤奮，尤其同客家文化融入客家語言獨特个節奏與韻律，分人耳目一新。〈夜合〉後來被譜成曲，由客家歌手陳雙演唱，十分好聽。寫有《臺灣客家話語言導論》、《六堆文化之變遷與歷史─語言篇》、《美濃鎮誌語言篇》等書。
二、客家音樂
因為歇个環境關係，客家人歸日在田上山肚做事，續有吔山歌个形成。客家山歌係客家人个頭文學，蓋有客家人个語言特色，在無記譜个時代，客家山歌滿山唱，緊摘茶緊唱歌。該時節，歌曲淨為著發聲，來排遣生活个沉悶，抑係為著傳情，同心肚个思戀藉山歌表達出來，歌詞三不二時係即興唱出。南部特有个客家山歌調有《大門聲》、《新民庄調》、《半山謠》、《大埔調》、《正月牌》、《搖兒曲》、《哥去採茶》等。
美濃農家子弟林生祥係現代客家音樂裡肚重要个人物，音樂曲風多變，擅長利用客家山歌、八音、民謠、傳統樂器抑係西方樂器創作，創作靈感多來自農村、農民同生活。伊識得著金曲獎最佳客語歌手、最佳作曲、作詞人，專輯更多擺入圍金曲獎同金音獎，係南部客家蓋有代表性个客籍歌手。出有《種樹》、《大地書房》、《我庄》等客語專輯。
三、客家技藝
- 油紙遮仔
手工做个油紙遮仔係美濃紙遮个製作手藝，1924年對大陸潮州傳入變做在地文化，最做得代表美濃特色个民俗技藝。油紙遮仔除了係抵日頭遮雨个日常用品外，也係嫁娶婚俗禮儀中不可少个東西。在早期客家庄裡肚，因為客家話「油」與「有」諧音，「紙」與「子」諧音，故所客家細妹仔行嫁時節，妹家通常會用兩支紙遮仔做嫁妝，有「早生貴子」个意思，也象徵多子多孫，紙遮遮面打開後形成圓形，為祝福新人生活美滿圓滿个意思，也有新娘行嫁下轎時，媒人也會用紅色油紙遮遮等新娘用做避邪。
油紙遮仔用个竹材，遮骨大部分使用堅硬有彈性，不易拗斷个孟宗竹為主，做前同孟宗竹浸泡在水肚一個月去糖分，過後曬燥竹材來防蛀蟲，經過鋸竹、削做遮骨、遮頭、遮柄、鑽孔、纒邊線等組合，遮骨結構完成過後再上膠、裱紙、修邊、上油、日曬、畫圖等步驟，才完成。
跈等工商洋遮仔个大量製作，技藝傳承出現了斷層，由最好時期2、30間做遮仔，到這下淨伸兩三間在做，手工油紙遮仔已對實用性轉變做收藏、裝飾觀賞用。
- 窯燒
美濃窯業對日本時代末期，龍肚、九芎林地區開始出現生產做建築用磚仔个「磚窯」工廠，跈等磚仔產業技術个變好，這種需大量人力又堅苦費力个「磚窯」工廠漸漸衰弱關廠，這下保存下來个「磚窯」無多，也毋完整。
記憶情景做得重現，家鄉个故事做得再傳承，因為這情懷，美濃在地業者已同這深化轉換做文化藝術个創作，創作藝品大部份係花盎仔、茶具同各型陶藝作品。有名陶藝家朱邦雄先生就係美濃人，高雄捷運橋頭站个陶壁作品「天工開物」就係伊个創作。
- 葫蘆雕刻
頭擺農村生活慣習在生產過剩抑係過老赴毋掣摘來食个瓠仔，分伊老化日曬過後做成舀水个東西，民國85年杉林區新庄國小校長黃泓清先生為著分在地生產个農作物變做精緻得人惜个藝術品，分藝術同生活結合，因緣聚會下同雕刻先生龔一舫先生共下推動葫蘆雕刻，得著文建會經費補助，並在地方公私部門同居民个合作之下，在88年創設全國第一座葫蘆雕刻藝術館，有系統个紹介葫蘆雕藝術，同時邀請龔一舫先生長期擔任學校及社區「瓠藝傳習方案」指導老師傳承各種雕刻技藝，地方有心之士也開始重視農業个加值，「杉林葫蘆藝術創作工坊」負責人何明賢老師也係行頭前个人，到這下共樣煞猛發展葫蘆藝術同創作。
葫蘆雕刻在經過多年个傳承同發展，雕刻技法多樣，有彩繪法、青刻法、浮水印法、素雕技法。藉傳統民間技藝和社區總體營造，葫蘆藝術已係變做杉林區一大特色，並一步一步行向打造杉林為全台首座葫蘆里个目標邁進。