跳到主要內容區塊
手機選單
:::

客語-客家文化之美

    資料來源:客家事務委員會       

    客語發音
    高雄那就有客家景點,在市區肚做得對探訪廟來了解客家人初到異鄉落地生根、群聚都市个生活情景,就像在三民區寶珠溝个高雄褒忠義民廟(三民區褒忠街114號)、寶珠溝福德祠(三民區建興橫巷5號)、右昌三山國王廟(楠梓區興昌里盛昌街143巷7號)、龍子里天公廟(鼓山區中華一路2133巷47號)、菜公福德祠(左營區菜公一路57巷1號)、鹽埕三山國王廟(鹽埕區鹽埕街54號)等。
     

    客語發音
    美濃、杉林、六龜、甲仙等客庄肚,除了三山國王廟外,還做得進一步探訪客家人敬字惜字个表徵-敬字亭、已列三級古蹟个「瀰濃庄敬字亭」,還做得探訪巷弄裡肚淨伸个一兩座客家夥房,像美濃湖附近个雙桂第林家夥房(美濃區民權路47號),還保留半月池同化胎等傳統客家夥房个樣式。係講愛觀光休閒个話,該就「高雄市新客家文化園區」(三民區同盟二路217號)除做得在室內參觀文物、欣賞表演外,還做得行到外背花草叢林間享受戶外个鳥語花香,還有「美濃客家文物館」(美濃區民族路49之3號)收藏豐富个傳統客家食衣住行育樂文物同體驗活動,三級古蹟「美濃東門樓」(美濃區永安路)、鍾理和紀念館等都是值得去个歷史文化景點。

     

    客語發音
    雙桂第林家夥房【雙桂第林家夥房】
    林家宗祠係美濃最大个夥房,前有半月池,屋後有化胎。雙桂代表个意思是林這個姓氏,其門樓上方的左右,各有一個圓形个孔,入門後可看到一個四角型的禾埕,同外背門樓上个兩個圓孔,正好代表著外圓內方。對門樓外背向裡肚看,做得看著對面月光山个兩個山峰,形狀像係頭擺放毛筆个筆架,代表著子孫勤學與博學。

     

    客語發音

    林家菸樓【林家菸樓】
    六十零年來,美濃菸葉從鼎盛行向式微,烘菸葉个工作場-菸樓,在烘菸電腦化後功成身退。這識在月光山下那就係,直直企等个特殊地景,漸漸行向廢忒个命運,政府為保留文化產業个重要依據,重建兩位「樣板菸樓」做為菸葉文化保存个示範空間,其中一棟就係「林家菸樓」。

     

    客語發音

    東門樓【東門樓】
    像高山企等个東門樓一直以來都係美濃地區有名个地標,對乾隆二十年,客家人推崇知識、重視教育,故所在四座柵門裡肚个東柵門起一座內樓,做得同屏東南大武山个文筆風遠看个門樓,用來萬望子孫都做得係人文才俊。歷經無數個年代,看著美濃事物个變遷,東門樓到今共樣企等無動个歡迎來這參訪个旅客。

     

    客語發音

    林春雨門樓【林春雨門樓】
    林春雨門樓起初係為著抵抗異族入侵來起个,當時居民多會利用竻竹林起做圍牆,高大个圍牆圍在夥房脣,淨禾埕頭前个柵門分居民出入,一般柵門會用木枋做門再用磚石堆起,有錢个人家會再加上裝飾,起較高大个屋簷,並安到「門樓」; 林春雨先生在當時係美濃地區最好額个,識種菸仔面積達到十六甲,並有十棟菸樓,當初所建門樓,這下就用林春雨先生命名。

     

    客語發音

    宋氏夥房【宋氏夥房】
    美濃最好額个「宋氏夥房」又安到「白馬名家」,入口處刻有「東倚青山地」、「門高白馬家」門聯。相傳清光緒年間,宋氏婦人摘菜歸屋下後,同菜暫放一個所在,隔日打早續消失無縱,為著尋出搶菜元凶,宋氏夫婦庰在暗處,暗晡頭淨看著一匹白馬出現,青菜被食淨淨,宋氏夫婦跈等白馬个腳印,尋跡尋到山肚,雖不見白馬,續發現一片吉地,本旦按算遷徙祖墳到這,沒想到動土時節挖著金銀財寶,宋家恁樣一夜變成好額人,為著感恩,宋家興辦「吟杏書室」並加改茶亭,提供來來去去个人客使用。

     

    客語發音

    廣善堂【廣善堂】
    廣善堂係日本時代美濃地區儒教信仰宣講勸善个重要場所,六堆地區个儒教信仰絕大多數也係在這為基點,向外擴展,有重要歷史地位;其主體建築同脣口圍牆共樣維持日本時代个形式,工法同材料保存下來,蓋有建築價值。

     

    客語發音

    鍾理和紀念館【鍾理和紀念館】
    鍾理和係台灣第一代个鄉土文學作家,小說裡肚對客家生活有蓋幼个描寫。1979年6月,由文學界林海音、鍾肇政、葉石濤、鄭清文、李喬、張良澤等人出名,發起籌建「鍾理和紀念館」,紀念館一樓在1983年8月落成,第三年興建二樓,完成這下个規模,館址座落在鍾理和晚年生活、寫作个故居美濃尖山山麓,土地由鍾理和家屬無條件提供。館中个紀念文物,除鍾理和個人資料外,像台灣地區作家个手稿、著作,也在收藏裡肚,紀念館脣口還設有「文學步道」,清幽林蔭肚做得看著蓋多座石碑,頂高刻有蓋多台灣文學作家个詩句,分人緬懷其豐沛文采。

     

    客語發音

    杉林黃家古厝【杉林黃家古厝】
    合興巷旁,蓋出色个牌樓餳人注意,這就係在月眉里个黃家江夏堂古厝,裡肚外背都展現出大家族氣勢,黃家係最早進入杉林開墾个客家族群,入口个牌樓橫寫「孝友遺風」、後背係「五經世第」,兩片用書同扇仔裝飾,顯現伊書香門第門。門前有一半圓形水塘像伊个肚屎,第二堂左右兩片各有一口水井就像伊个一雙目珠,再加上三合院落个型式,整體看來就像一隻毛蟹,因此,人講江夏堂歇在毛蟹穴。

    :::
    ▲開啟 ▼關閉