美濃、杉林、甲仙、六龜等山城客庄个客家人大部份對外地遷徙入，飲食也融合了台灣南北客家菜个特殊風味同文化特色，漸漸開創出有在地特殊飲食文化同無相同風格个美味佳餚，料理中毋單淨保持食物个原汁原味，還善用香料同搵醬，研製獨樹一幟个創意客家美食料理，更重要个係，高雄市每個行政區域，甚至鄰里社區，那就都做得尋著所在獨特同「阿姆个味緒」个客家美食。
根據本會100年「客家美食產業調查」結果，高雄市客家餐廳同粄條店大約有124間，各行政區多多少少都有以客家為名餐廳抑係細店，都用自家手藝特色餳四方食客，裡肚係美濃區間數最多，三民區排第二。為著鼓勵並輔導這兜餐廳抑係細店向優質化發展，本會在100年辦理「客家美食業者認證輔導培訓計畫」，遴聘各領域專家評選出15間優質餐廳同粄條店，投入改造基金協助業者改造店面、改善衛生環境、研發新菜色、開發等路、培訓服務技巧同管理行銷，分店家服務品質升級，提高客家菜个品牌形象，開拓客家美食。