高雄市政府客家事務委員會

一個光影，一筆色神，一間細屋仔

idˋ ge gongˊ iangˋ, idˋ bidˋ sedˋ siinˇ, idˋ gianˊ se vugˋ eˋ

庰等盤花公園个百花記憶

biang nenˋ panˇ faˊ gungˊ ianˇ ge bagˋ faˊ gi i

對盤花起福个精神出發

dui panˇ faˊ hiˋ fugˋ ge jinˊ siinˇ cudˋ fadˋ

定定仔編出盤花公園个藝術風景

tin tin eˊ bienˊ cudˋ panˇ faˊ gungˊ ianˇ ge ngi sud fungˊ ginˋ

跈等時間个流動，𠊎等个故事同記憶乜恬恬仔囥入來

tenˇ nenˋ siiˇ gianˊ ge liuˇ tung, ngaiˇ nenˊ ge gu sii tungˇ gi i me diamˊ diamˊ eˊ kong ngib loiˇ

這係一條毋會撞走个花徑
iaˋ he  idˋ tiauˇ mˇ voi  cong  zeuˋ ge  faˊ gang

緩緩仔坐下來！風會帶你共下欣賞故事
fon  fon  eˊ coˊ haˊ loiˇ！ fungˊ voi   dai  nˇ kiung  ha  himˊ songˋ gu  sii

用開等个花形做靈感
iung  koiˊ nenˋ ge  faˊ hinˇ zo  linˇ gamˋ

彎斡个線條像花瓣一皮一皮打開來
vanˊ vadˋ ge  xien  tiauˇ qiong  faˊ pan  idˋ piˇ idˋ piˇ daˋ koiˊ loi

凳仔就像停動个長帶仔，代表客家傳統盤花「團結圓滿、共心共好」个文化內涵
den  eˋ qiu  qiong  tinˇ tungˊ ge  congˇ dai  eˋ，toi  beuˋ hagˋ gaˊ conˇ tungˋ panˇ faˊ「tonˇ giadˋ ianˇ manˊ、kiung  ximˊ kiung  hoˋ」ge  vunˇ fa  nui  hamˇ

代表族群在土地項，世代交合、永流傳个生命腳跡
toi  beuˋ cug  kiunˇ teˊ tuˋ ti  hong，sii  toi  kauˊ gabˋ、iunˋ liuˇ conˇ ge  senˊ miang  giogˋ jiagˋ

所有个起落改變，都係毋會頓恬个對話同故事
soˋ iuˊ ge  hiˋ log  goiˋ bien，duˊ he  mˇ voi  dunˋ diamˊ ge  dui  fa  tungˇ  gu  sii

穿過竹仔編个蟲包步道，每一步腳都係轉變同新个開始
conˊ go zugˋ eˋ bienˊ ge  cungˇ bauˊ pu  to，miˊ idˋ pu  giogˋ duˊ he  zonˋ bien  tungˇ xinˊ ge  koiˊ siiˋ

用天然个竹仔做主體，展現客家傳統竹仔藝術个靚
iung  tienˊ ianˇ ge  zugˋ eˋ zo  zuˋ tiˋ ，zanˋ hian  hagˋ gaˊ conˇ tungˋ zugˋ eˋ ngi  sud  ge  jiangˊ

也看得著客家族群遷徙過程个堅耐精神
iaˊ kon  eˋ doˋ hagˋ gaˊ cug   kiunˇ qienˊ saiˋ go  cangˇ ge  gianˊ ngai  jinˊ siinˇ

經過遷徙、探根、發展个過程
ginˊ go  qienˊ saiˋ、dam  ginˊ、fadˋ zanˋ ge  go  cangˇ

就像係拚出「蟲包」樣仔，展現出新个樣貌
qiu  qiong  he  bia  cudˋ「cungˇ bauˊ」iong  eˊ，zanˋ hian  cudˋ xinˊ ge  iong  mau

一條一條枕木个印，係北客識行過个路
idˋ tiauˇ idˋ tiauˇ ziimˋ mugˋ ge  iang，he  bedˋ hagˋ siidˋ hangˇ go  ge  lu

佢等跈鐵路來，㧡等夢想同希望
iˇ nenˊ tenˇ tiedˋ lu  loiˇ，kaiˊ nenˋ mung  xiongˋ tungˇ hiˊ mong

記憶恬恬仔磡在腳下，細聲細語講等該段毋識添放核个旅程
gi  i  diamˊ diamˊ eˊ  kamˋ teˊ giogˋ ha ˊ，se  sangˊ se  ngiˊ gongˋ nenˋ ge  ton  mˇ  siidˋ tiamˊ boing  hedˋ ge  liˋ cangˇ

用「鐵路」代表歷史，鑲入地景
iung「tiedˋ lu」 toi  bieuˋ lid  siiˋ，xiongˊ ngib  ti  ginˋ

重新看著北部客家族群遷徙南方个時代脈絡
cungˇ xinˊ kon  doˋ bedˋ pu  hagˋ gaˊ cug  kiun ˇ qienˊ saiˋ namˇ fongˊ ge  siiˇ toi  mag  log

日治時期基隆到高雄縱貫鐵路个興建
ngidˋ zii  siiˇ kiˇ giˊ lungˇ do  goˊhiungˇ jiungˊ gon  tiedˋ lu  ge  hinˊ gian

使得北部客家人跈等鐵路下南絡食
siiˋ dedˋ bedˋ pu  hagˋ gaˊ nginˇ tenˇ nenˋ tiedˋ lu  haˊ namˇ logˋ siid

加入鐵路建設、搬運、維修个頭路
gaˊ ngib  tiedˋ lu  gian  sadˋ、banˊ iun、viˇ xiuˊ ge  teuˇ lu

這係臺灣客家社會重要个島內移民歷史
iaˋ he  toiˇ vanˊ hagˋ gaˊsa  fi  cung  ieu  ge  doˋ nui  iˇ minˇ lid  siiˋ